Հոքուներ և Թանկաներ

ԲԱՍՅՈ -  Հոքուներ

Թարգմանությունը` Նաիրի Զարյանի

***

Ամառային խոտեր:

Ահա նրանք, ընկած զինվորի

Փառքի երազանքները:

***

Դաժա~ն ճակատագիր:

Այս փառավոր սաղավարտի ներքո

Այսօր ծղրիդն է ծղրտում:

***

Ի~նչ լուռ է այս այգին:

Ժայռերի սիրտն է թափանցում

Ծղրիդների խաղաղ երգը:

***

Գարու հասկից

Ես բռնեցի, որ վայր չընկնեմ...

Ինչքան դժվա~ր է բաժանման րոպեն:

***

Ձկնորսի խրճիթին մոտիկ,

Խեցու կույտերին խառնված,

Իր երգն է ծորում մի ճպուռ:

***

Օ~, այս ամայի ճանապարհը:

Խտանում է մշուշը աշնան,

Եվ չկա մի շունչ կենդանի: