Տարոնին «պլեն են վերցրել»

ՀՀԿ ԳՄ եւ խորհրդի նիստերից հետո, Տարոն Մարգարյանի շփումը լրագրողների հետ այնպիսի տպավորություն թողեց ինձ վրա, ասես քաղաքապետը կրակին յուղ էր դրել՝ հալեցնելու ու մոռացել… Շտապել բառը մի տեսակ ջիգյարով չի, վռազում էր՝ յուղը կթափվի…  Լրագրողների հարցերն էլ քանի որ յուրատեսակ կրակ էին, ուզում էր «փախչել», բայց մեկ էլ կրակի մի բաց երախ քաշում էր նրա շորից ու ետ բերում…

Կարծում եմ Տարոն Մարգարյանը հետաքրքիր նյութ տվեց իրավապահ մարմիններին, ու իրավապահները, եթե ուզում են «հոպ-ստոպ» անել, կարող են միանգամից շատերին անել… Հիմա եմ հասկանում, թե ինչու Տարոնը չի սիրում հարցազրույց տալ եւ ճիշտ էլ անում է: Ոչ այն, ոչ այն, լրագրողական հետաքննությունից ձեռքերը վեր բարձրացրեց ու կրակի բերանը տվեց շատերին. «Մտածելու բան ունեն այն քաղաքական ուժերը, որոնք իրենց ունեցվածքն ազնվորեն չեն հայտարարագրել»: Այստեղ են ասել՝ Տարոն ջան, մեռնեմ քո տված հարցազրույցին էլ, քո ազնվությանն էլ… Որո՞նք են այդ քաղաքական ուժերը: ԱԻ՞Մ-ը, որի առաջնորդն ընտրությանը մասնակցելու համար ժողովրդից էր հանգանակություն խնդրում, մահափորձից հետո էլ փող տվիք, որ կարողանա արտասահմանում բուժվել…
Թե՞ ՀԱԿ-ը, որի առաջնորդը եթե երկրորդ տունն ունենար, անպայման հազար կանալով մեյդան կհանվեր… Կամ գուցե Տարոնն ուզում էր ասել՝ մյուս պետական պաշտոնյա հանրապետականները… կամ բարգավաճները…

Այստեղ լրիվ համամիտ եմ մեր միլիոնապետի հետ. իբր Տարոնի ունեցվածքի չափ ո՞ր մի հանրապետական- բարգավաճ պաշտոնյան չունի… Ջահել, անփորձ տղա եք տեսել, սաղ-սաղ խորովու՞մ եք… Զանգի պես Տարոնի ունեցվածքը կախել եք նրա ճակատից ու ամեն խոսելուց՝ գլխին եք տալիս… Չէ՜, Տարոն ջան, ով որ քեզ խորհուրդ է տվել, որ ունեցվածքիդ մի մասը հայտարարագրես, քո վրա «աչոք է» հավաքել, էդ մի մասն էլ գցեիր էլի աներձագիկներիդ եւ այլ ձագուկներիդ անունով, ոնց որ իրենք են արել… Դա նշանակում է, որ քեզ խորհուրդ տվողը ոտով-ձեռով քեզ գերի է վերցրել, մի քիչ  «լեվի գնաս», մեջտեղ կհանվի ՀԱԿ-ի բողոքը… Քաղաքական լեզվով դա «կոմպրոմատ հավաքել է» նշանակում: Բա՜… Տարոն ջան, քեզ «պլեն են վերցրել, քաղաքական պլեն»: Մնացածները երեւի ավելի վստահելի են եղել  կամ էլ կարեւոր չեն եղել քեզ խորհուրդ տվողի համար… Իրավապահներին մնում է Տարոնին հարցնել՝ ովքե՞ր  են իրենց ունեցվածքը թաքցնողները… Չասես, Տարոն ջան, թե չէ գործդ ավելի կբարդանա, անուններ չտաս… Որ մոմենտին մեկին դեմ տվիր, «մեր օրը կընկնես»:

Հասմիկ Բաբաջանյան